نتائج مؤتمر القمرق

طلعت نتائج مؤتمر القمرق

ترشحوا 3 قوائم واحدة يدعمها الاتحاد الجهوي في تونس العاصمة والشاذلي البعزاوي كاتب عام جامعة المالية، وواحدة خوانجية يدعمها علي رمضان ومصطفى بن احمد بالوكالة، وللي ما يعرفش مصطفى بن احمد، يا سيدي هذا عضو المكتب التنفيذي القديم قبل ما يجي التصحيح المبارك كان واحد من جماعة السحباني وقعد يدافع ووفي للسحباني حتى وقت اللي كان السحباني يلم في قشه من الاتحاد باش يستقيل وهذاكه علاش جماعة التصحيح زملاه سيّقوه في مؤتمر جربة وجاب 74 صوت، سي مصطفى هذا من حركة التجديد وترشح لقيادتها في المؤتمر الأخير وما نجحش معروف بمواقفه " المبدئية " الراديكالية من الاخوانجية وكي تسمعوا يلبلب في ها الموضوع هذايا تبقى حال فمك هو اللي يدعم في قائمة الاخوانجية خدمة لعلي رمضان على خاطر علي رمضان هو الرجل القوي في الاتحاد وإذا مصطفى ما يخدموش باعتباره ولد القمرق غدوة ينش عليه محمد الطرابلسي يسيّقو من قسم العلاقات الخارجية وينسى مصطفى المنحة والسفرات وهو مسكين اللي ما غادر تراب تونس كان وقت اللي ولى مسهول في الاتحاد وخاصة كي ولى يخدم في قسم العلاقات الخارجية.

وقائمة ثالثة ديمقراطية فيها وجوه يسارية ومستقلة يبخر علي رمضان بريحتهم.

مدة المؤتمر حركت الشعبة والمدير اللي كان في كونجي رجع على عجل ودارت المكينة باش تطلع نقابة الادارة واللي هي في الحقيقة تتكون من زعماء البطاطا، ماو تعرف في القمرق اللي يسرقو باكوات دخان ويخرجوهم بالسرقة ويبيعوهم البرة للحوانت والقمارق يسموهم البطاطجية ومن أشهرهم محمد ترينيتا

لو كان نحكيلكم على طريقة تنظيم البطاطجية شيء يوقّف المخ حتى المافيا كازا نوسترا الطليان موش منظمة كيفهم واعتى الاحزاب السرية ماهيش كيفهم في طرق الاتصال السري والفصل بين الخلايا والعناصر وطريقة القسمة و..و..و.. شيء عجب من وراء العقل

القائمة هذه هي اللي نجحت

سي هشام الوسلاتي ومحمد ترينيتا والطيب العباشي الكاتب العام القديم الجديد خوانجي repenti ومحمد علي العش والرياحي

ومن غدوة الادارة تهني في روحها بالانتصار

والشعبة تهني في روحها بالانتصار

والاتحاد الجهوي يهني في روحو بالانتصار

وجامعة المالية تهني في روحها بالانتصار

وبرّه عاد افهم

فهمتش حاجة؟؟؟؟