منصف السويسي معلّم وإلا لا

منصف السويسي معلّم وإلا لا

في المدة الأخيرة الممثلين متاع المسرح والسينما اللي يقولولهم متاع الفنون الدرامية عملو نقابة

إيه نعم عملو نقابة، إيش بيه ياخي كان الفنانين المصارة يعملو نقابة ونقابة قوية عندها كلمتها وساعات كلمتها أقوى من كلمة برشة ناس أخرين أقوى حتى من كلمة الأحزاب

عاد قلت الفنانين متاعنا هاك اللي نشوفو برشة منهم في التلفزة وفي المسلسلات وأفلام السينما حتى كان احنا ما عناش برشة افلام، عملو نقابة وأشرف على المؤتمر متاعهم الاتحاد الجهوي متاع تونس في شخص سي راضي بن حسين ( ولد البي بالحق من سلالة الباي وشفتو كيفاش موش ديما النار تخلف الرماد ساعات ياقع العكس البايات يخلفو النقابيين والمناضلين ، أه ماللة )

يا سيدي ها المؤتمر هذا طلّع هيئة بسبعة من الناس منهم جمال مداني وجمال ساسي خو الفقيد المناضل فاضل ساسي شهيد أحداث الخبز 84 ومنهم يا سيدي يا بن سيدي سي المنصف السويسي اللي يحب يطلّع جماعة أصحابو أو ربما يتفاهم معاهم أكثر لكن الله غالب طلع من جماعتو كان هو

سي المنصف كان يحب يكون اغلبي في التشكيلة باش ينتخبوه جماعتو كاتب عام، ويظهر اللي سي المنصف عندو بعض أفاريات، سامحوني في الكامة، نحب نقول عندو بعض حسابات ربما يحب يصفيها وربما النقابة والكتابة العامة على رأس النقابة تساعدو عليها

لكن الجماعة اللي طلعو في ها التشكيلة عندهم راي آخر يحبو النقابة تكون أداة للدفاع على مشاكل أهل المهنة ويحبو يستعملوها لمعالجة اوضاع الممثلين وإعانتهم على حلان مشاكلهم المادية وغيرها

سي المنصف كيف عرف اللي الجو موش مواتي وكيف فهم اللي توزيع المسهوليات في مكتب النقابة يتم بالانتخاب، معناها كيف فهم اللي الجماعة اللي طلعو ماهمش باش يصوتولو كاتب عام انسحب قبل ما يعملو الحالة المدنية هاك الورقة اللي يعمرها الاتحاد ويحط فيها توزيع المسهوليات

والانسحاب في مثل ها المرحلة هذه في قانون الاتحاد هو استقالة

وقتها ولى الاتحاد اعتبر انسحابه استقالة وخذا اللي جاء في المرتبة الثامنة في الانتخابات

على خاطر سي المنصف يحب يكون ياما معلم والا لا