زعمة يتحل المشكل فيسع؟

البوم على هامش الاحتفال بيوم 10 ديسمبر ذكرى الاعلان العالمي لحقوق الانسان في قصر قرطاج، وتونس كيما تعرفو الناس الكل ولات واحدة من أكبر منتجي ومصدري حقوق الانسان ويلزمها تحتفل بها المناسبة كيما يلزم، اليوم عاده كيما قلت على هامش ها الاحتفال في هاك الريسبسيون reception معناها هاك البوز pause اللي تتعمل وياكلو فيها المدعوين ما لذ وطاب ( شي كبير ) وتتنظم فيها برشة لقاءات وتتربط خيوط وتتقضى قضيات واتمّ صفقات الحاصل يصير بزنس ماهو بزنس سياسي وأفارياتي وغيره،

الحاصل ما نطول عليكم في ها الريسيبسيون دار حديث هكة بالواقفة بين وزير التربية وبعض أعضاء قيادة الاتحاد، اتحاد الشغل نقصد، ويظهر اللي جبدو فيه على حكاية هاك الثلاثة أساتذة اللي عاملين إضراب جوع من نهار 20 نوفمبر الفايت، معناها توة عندهم 21 يوم مقرفين والحاكم موش لهنا والوزير عامل روحو مغناني ، وهوما انشالله حتى يموتو آش يهمو هو، عاد اليوم سي الوزير كيف اللي يحتج على ها الزبلة اللي عاملينها ها الجميعة المقرفين ويحبو يخوضو الشمبري ويعملو فوضى في البلاد.

يظهر اللي بعد برشة حديث وأخذ ورد وعد باش غدوة أو بعد غدوة باش يكلف مدير ديوانه بالحديث مع الكاتب العام متاع نقابة الاساتذة بشرط أنه يكون معاه عضو من قيادة الاتحاد.

مشيكلة صغيرة صارت اللي هي أنه الكاتب العام متاع الاساتذة يحب يمشي كان مع علي رمضان على خاطر المنصف الزاهي ها الايامات ولى عندو مواقف موش ولا بد ، بصراحة خايبة حسب سي الشاذلي كتاع الاساتذة، لكن يظهر اللي زملاه في النقابة العامة يحبو يمشي وفد ويقصدو هوما بالوفد واحد ولا أكثر من أعضاء النقابة العامة واللي يجي من أعضاء المكتب التنفيذي.

الفكرة هذه ما عجبتش الكاتب العام متاع الاساتذة وشافها أنها علامة قلة ثقة.

وهي بناتنا قلة ثقة ولكن قلة ثقة في محلها على خاطر أعضاء النقابة العامة كلهم، باستثناء نعيمة الهمامي، ما عندهمش ثقة في الكاتب العام ويخافو منه في مثل ها الملفات والمناسبات أنه يتصرف عكس ما يوصيوه بيه

على كل حال احنا الواحد آش يقول نتمنو أنه ها اللقاء يصير ويحل مشكلة المقرفين اللي بصراحة صحتهم تعبت ياسر والناس الكل ولات متحيرة نسبيا عليهم.

وبطبيعة الحال مثل ها الدوسي ما ينجمش يكون موضوع متاع مساومات وصفقات ، وحتى كان ثمة حاجة توة تظهر غدوة علاش نسبقو الاحداث

نتمنو أن ها المشكل يتحل في القريب العاجل ونشوفو هاك النوارات من شبابنا محمد وعلي ومعز يخدمو على رواحهم ونفرحو بيهم .

محمد المومني أستاذ فلسفة مطرد من خدمتو

علي الجلولي أستاذ فلسفة كيف كيف

معز الزغلامي أستاذ أنجليزية نفس الشي

عـــــــــــــــــــــــلاش؟؟؟؟؟؟؟ توة نحكيلكم