صنعة جديدة

الجماعة اللي عيطولهم للجنة النظام الوطنية سألوهم برشة أسئلة كل واحد على الاحداث اللي هو متهموم بالمشاركة فيها.

لكن السؤال اللي بالحق موش مفهوم والا ع الأقل الواحد ما يتصورش اللي جماعة لجنة النظام يسمحو لرواحهم طرحه على النقابيين وحتى كان هوما سمحوا لرواحهم وتجاوزوا حدودهم كان على القيادة اللي تسهر على لجنة النظام ويتبع فيها ما تخليهمش يعملو على كيفهم.

السؤال الغريب هو

في تجمع نهار 9 جويلية 2007 في دار الاتحاد في تونس رفعوا شعارات مناهضة للقيادة آش كون رفعها؟

يعني بلغة أخرى طلبو منهم باش يقودولهم رغم اللي القيادة صورت التجمع وعندها فيلم كامل وبمقدورها باش تعرف آش كون رفع الشعارات وشكون تكلم الخ...

أما انهم يطلبو منهم آش كون رفع الشعارات ما عندو حتى تفسير آخر غير أنهم يلزو فيهم باش يقودو واللي ماهوش مستانس بالقوادة باش يولي يقود، وهكاكه يصح على لجنة النظام أنها ولت عندها وظيفة أخرى وهي تدريب النقابيين على القوادة.

وتنجم تقول اللي لجنة النظام عندها حق في ها الوظيفة الجديدة على خاطر ماو تعرف اللي في الاتحاد القوادة موش حاجة جديدة، هي خدمة قديمة من زمان وعطات مفعولها قبل، وسبق اللي برشة حاجات باهية وهايلة تعمل في الاتحاد بفضل القوادة

آخة هاك العام موش اطرّد الصحراوي من المكتب التنفيذي بقوادة وهكاكا ارتاح الاتحاد من واحد مخطر كان ينجم يهلك المنظمة الشغيلة العزيزة على قلوب برشة ناس؟

إيييييه لو كان نعددو الحاجات الباهية اللي حصلت بالقوادة يحبنا شهر وما نكملوش

لكن ها القوادة كانت تتعمل بطرق غير علمية يعني أصحابها ما عندهمش شهائد علمية متخصصة في القوادة

القوّادة الموجودين فلحوا في ها الصنعة هكاك بالتجربة رعواني يعني، وهاونو كل واحد وجهدو وكل واحد وذكاه

وبما اننا نحن توة في عهد الامتياز وبما أنو القوادة كثرو ما عادش ممكن نواصلو العمل بالطرق القديمة يلزمنا ندخلو على الوضع تحسينات ولازمنا نطبقو على كل جوانب حياتنا في المنظمة قواعد الجودة باش يولي كل شيء من النوع الممتاز حتى القوادة تولي عندنا القوّادة الممتازين والقوادة اللي هكاك وبرّه

ويظهر اللي ها المشروع بدا العمل بيه من توة وبدات لجنة النظام في عملية التدريب التمهيدي لتخريج دفعات جديدة من القّوادة الممتازين.

يسامحوني الاخوة اللي تعدوا على لجنة النظام ما نقصدش اللي هوما ولاو قوّادة ولكن حبيت نعرف الناس بالدور الجديد اللي ولات تقوم بيه لجنة النظام الوطنية ولها مني ألف تحية هي واللي ساهرين عليها

وكان الله في عونها وعونهم

والشيء من مأتاه لا يستغرب