نعبّر وإلا ما نعبّرش

هوما عندهم جريدة " الشعب "وعندهم الجرائد متاع الحاكم واللي حاسبة روحها ماهيش متاع الحاكم وعندهم ميكروفون الاجتماعات والندوات وحفلات الاستقبال وعندهم أبواق الدعاية متاعهم هاك الجماعة اللي يصبحوا م الفجاري في البطحاء يستنوا لامين العام يطل باش يسلموا عليه ويرافقوه حتى لباب الدروج وبعدين يسرح كل واحد منهم في حال سبيلو

هوما عندهم كل ها المنابر والادوات

ونحن آش عندنا؟

حتى كيف تتكلم نهار والا 2 في العام وتسخن وترفع شعارات وتفرغ قلبك يقولو عليك مشوش وخلواض وتكره المنظمة وتحب تربك القيادة وعندك أجنده سياسية ما عندها علاقة بمصلحة المنظمة ويشنوا عليك حملة دعاية، الحاصل تولي عبارة على مجرم والعدو الاول للاتحاد

وما دام الحكاية هكة آش يعمل الواحد

يولي يفش غيضه على الانترنت

ويرحم والدين العلم

عاد إذا كان هوما يحبوا يلجموننا أفامنا باش يضربوا ويحطوا في التركينة

وكل واحد يتضرب يحملها في ضعده ويمشي لا نايحة لا دفينا

ماهو الواحد ما يهبطش يديه ويدافع على الكلمة الحرة

وكلمة حرة أفضل من ألف حيلة